He Kura Kāinga
Whāia he āhuru mōwai ki konei.
Ka whakapau kaha Te Wānanga Ihorangi kia tutuki ai tō whai i te reo. Ko te hiahia, kia noho tēnei whare hei kāinga rua mōu e ako nei, e whakamātau nei, e whanake haere nei.
Inā kōwhiri koe i Te Wānanga Ihorangi, anei ngā tino kaupapa:
Rumaki
Ko tō mātou ara ako matua, ko te whakarite wāhi e rumaki ai te reo. Ko ō mātou kura tērā, me ngā Tohu Pōkairua NZQA hoki i te reo Māori. E mōhio nei mātou ka wehi pea te tangata i tēnei āhuatanga, heoi, koinei pū te huarahi tika e mau ai te reo ki ngā ngutu o ngā ākonga.
Kounga
Ka akiaki, ka wero hoki ā mātou hōtaka i ngā ākonga kia whāia te reo Māori ki tōna keokeonga. Ka mau tonu mātou ki te whāinga kia puta ake he ika ā-whiro e pakari nei ki te tuhi, ki te pānui me te kōrero i te reo Māori.
Tiaki Mauri
He ara ō-riri whakauaua te whakaora mai anō i te reo. Mō te hunga whai i te reo Māori, he wāhi whakamataku te akomanga, he wāhi e puea anō ai ngā tāmitanga o mua kia kīia ai te tangata he tūtūā noa ia. Āe rā, kei te mārama mātou ki ēnei kōrero, ā, ka ngaukino mai te pōuri.
Kua whakaritea e Te Wānanga Ihorangi tētahi kaupapa e whai whakaaro ana ki ngā pāmamaetanga ki te reo. Ki konei kitea ai he kāhui kaiako atawhai, he kaupapa tautāwhi ākonga hoki. He tino pai te ōwehenga kaiako, ā, he kaiāwhina tō ia karaehe. He huihuinga ako mō te hunga tōmuri, tae noa ki ngā wā ako takitahi ka tū ia Paraire. E kore e taea e Te Wānanga Ihorangi tēnei mea te pukumahi te whakakapi kia ora ai tō reo Māori. Heoi, ko tā mātou he turaki i ngā tauārai e eke panuku ai ā mātou ākonga.
Tuakana-Teina
Ko te ariā whakaaro - kia koha atu, kia koha mai - ka arataki i ā mātou kura wānanga me ngā hōtaka. He momo hirahiratanga kei ia kaiako, kaiāwhina, ākonga, kaumātua, paakeke me ika ā-whiro hoki hei takoha mai ki tēnei wāhi ako. Āe, ko koe hoki tēnā! Ka noho tōmua ngā takohatanga mai a ngā hapori, ā, ka ngana mātou ki te whakatutuki i ō whakahoki kōrero ka hua ake hei ngā tau e haere ake nei.
Whakapono
Te Whakatinanatanga
“Ko te kaupapa o Te Wānanga Ihorangi he kaupapa i hua mai i te kōingo nui o te ngākau ki te whakatū i tētahi kaupapa hei akiaki i te reo ki te horopaki o te whakapono. I tipu ahau ki te Haahi Iriiri, i tipu hoki ahau ki roto i te Hāhi Ringatū ki runga i ōku marae, ki ngā rekereke o ōku tīpuna – kīhai taku whakapono me taku Māoritanga i tukituki, kīhai taku reo me taku whakapono i tukituki.
He kura tēnei mō te katoa, mātua rā ko te reo Māori – ko te reo Māori te oranga o te ahurea Māori. Whakakotahi mai e te iwi, kia hāpaitia te reo Māori, kia horapa whānui te kakara o te reo Māori ki ngā tōpito katoa o te motu. Kia tapatahi te ngākau mō te reo te take, ahakoa ngā wehenga ā-whakapono, ā-iwi, ā-aha ake rānei mā roto i te aroha me te tūmanako.”
Anameka Paenga (Te Whānau-a-Apanui, Te Whakatōhea, Ngāi Tai),
Te Wānanga Ihorangi Tumuaki | Co-Principal